Diario de Noticias de Gipuzkoa

Sábado, 03 de mayo de 2008

Foros
Hemeroteca

Cartas al Director

Igeldoko haurrak arriskuan

Dagoeneko urtebete pasa da Igeldoko Guraso Elkartearen izenean Donostiako Udalari gure herriko kaskotik igarotzen duen bidean abiada murrizteko badenak jartzeko eskaera luzatu geniola. Arrazoia sinplea da: haurrek herriko plazatik eskolara edota frontoira joateko bidea pasa behar dute eta, bidearen alde batean autoak aparkatuta egoten direnez, ez dute ezer ikusten bidera irten arte.

Donostiako Udalaren partetik jaso genuen erantzunaren arabera, gure eskaera ezin omen zen bete bertatik autobusa pasatzen zelako eta abiada murrizteko badenak autobusarentzat oztopo bat zirelako!¿? Erantzuna jasotzean denak nahiko harrituta geratuko ginen. Nola? Donostiako zenbat lekutan daude autoen abiada murrizteko horrelako badenak jarrita? Bertatik ez al da autobusik pasatzen? Perlaren aurrean daudenek ez al dute autobusen joan-etorria eragozten? Harrigarria!

Orain dela hiru hilabete, herriko eskola berriaren inaugurazio ofizialera hurbildu ziren Donostiako agintariei berriro ere gure kezka agertu eta ditxosozko baden horiek lehenbailehen jar-tzeko eskatu genien, baina badirudi politiko donostiarrei Igeldo hitza entzutean alzheimerra sartzen zaiela.

Azken hilabetean bi haur istripu larria eduki-tzeko zorian egon direnez, orain dela urtebete egindako eskaera bera berriro egitea pentsatu dugu, oraingoan publikoki: mesedez eta faborez, gure seme-alaben segurtasunagatik, frontoia eta eskolaren irteeren parean hesi pare bat eta bidean abiada murrizteko badenak lehenbailehen jarri! Ea oraingoan!

Eta eskatzen hasita… zer moduz, herriko plazako parketik orain dela bost hilabete eramandako txirrista ere behingoz konpondu eta bere lekuan jartzen baduzue? Penagarria benetan!

Josi Oiarbide Alustiza

Igeldoko "Mendizorrotz" Guraso Elkartea