Diario de Noticias de Gipuzkoa

Jueves, 03 de abril de 2008

Foros
Hemeroteca

Ziritik

El lendacari

por Xabier Euzkitze

ARTXOAREN 9ko hauteskundeak Espainiako hauteskunde orokorrak izan zirela eta autonomikoetan gauzak berriro "bere onera" etorriko direla ziurtatu arren, batzuk urduri samar sumatu ditut inguruan. Lehen aldiz lehendakari ez-abertzale bat izateko "arriskua" hurbilago ikusten dutela begitantzen zait. Ulertzekoa da ogibidea kolokan izan dezakeenaren egonezina, baina ez diezagutela trajedia gisa sal. Nire botorik nekez izango badu ere, ez dut arazorik lehendakari ez-abertzale bat neure lehendakari sentitzeko. Ideologia ez, siglak ere ez, hizkun-tza da harekiko arrakala gaindiezina sor dezakeena. Ezker Abertzaleak aurkezterik balu eta Eusko Alkartasunakbakarrik balihoa lehendakarigai euskaldunak aurkeztuko lituzkete zalantzarik gabe, Aralarrek bezala. Ibarretxek maila ederra lortu du, Jabier Madrazok euskaraz ikasteko ahaleginetan dihardu, Maria San Gilek ere bai. Ez dut Patxi Lopezen berririk, baietz pentsatu nahi dut baina. Ahalegin berezi bat egin dut lehendakari ez-euskaldun bat irudikatzeko. Siglarik ez, lehendakaria irudikatu du, El Lendacari. Zer lehendakari litzateke herritarrekin bertako mintzairan bi hizkuntza ofizialetako batean mintzatzeko gai ez dena? Gure alabatxoarekin ulertzeko gai ez litzateke izango. Errezil, Aramaio edo Ispasterrera joango balitz, hango herritarrak oraindik ongi ikasi ez duten hizkuntza batean mintzatzera behartuko lituzke, elkar ulertzekotan. Californiako Chinon dagoen euskal-etxera bisita ofiziala egingo balu, ezin izango luke Monic Bereterretx etxekanderearekin edo ostatuko bezeroekin elkarrizketarik izan. Euskadi Literatur Sariak banatzera joan beharko balu, euskarazko liburu bat irakurtzeko gai ez den batek zorionduko lituzke irabazleak. "Kalaka" saioan elkarrizketatu nahiko banu, itzulpen simultaneoa beharko genuke. Lehendakariak euskaraz ez baleki…sekula ez litzateke nire lehendakari izango.