Diario de Noticias de Gipuzkoa

Domingo, 30 de marzo de 2008

Foros
Hemeroteca

Parentesiak

Ordubete

por arantxa iturbe

ZAGUTZEN ditut bi lagun erlojua orduz aldatzen ez dutenak. Bati gaurtik aurrera, azken urte erdian ez bezala, ordu ofiziala erakutsiko dio; besteak, aldiz, ordubeteko atzerapenarekin biziko ditu datozen sei hilabeteak. Boikot partikularraren arrazoiaz galdetutakoan lehendabizikoak erantzun zidan: "zertarako?, badakit zer ordu den"; bigarrenari galdetu nionean, lan gehiago ematen diola ditxosozko erloju botoidun horretan aldaketak egiteak ze ordutan bizi den jakiteak baino.

Egun batzuk beharko dituzte biek egoera berrira ohitzen. Batek erlojuari begiratzen dion bakoitzean gogora arazi beharko diolako bere buruari orain ikusten duen ordua bat datorrela inguruko gainontzekoen orduarekin; besteak, alderantziz. Ohitu arte izango da hori ere. Azken batean, erlojua aldatu edo ez, denok beharko dugu denbora egokitzeko. Bi zentzutan, gainera. Eskumuturreko eta poltsikoetakoez gain, etxeko logela bakoitzean dauzkagun iratzargailuak, telebistakoa, labekoa, sukaldekoa, egongelakoa(k), non jarri erabaki ezin eta pasilluko itzaletan jarritakoa, umeen jostailutakoak, berogailuaren programatzailekoa, autoetakoak eta une honetan, eta datozenetan ere, ahaztuko zaigun beste bakarren bat. Beraz, ezin ukatu egokitzeko denbora beharko dugunik zentzurik pragmatikoenean. Eta gero dator beste egokitzea. Gorpu-tzarena. Gorputzari agindu lehen bostak ziren tokian gaur seiak direla eta kitto. Hori bezain erraza. Gorputza esanekoa da oso. Ohitu egingo da zazpietan jeikitzen erlojuak zortziak direla esaten badio.

Burua beste kontu bat da. Nireak ez du oraindik ulertzen ordua atzeratu edo aurreratu egin den. Ezin du ulertu zer gertatu zaion bart gaueko orduari. Ordubeteari. Ze, gureak ez dira orduak: ordubeteak dira. Ordua bete momentu onez eta ordubete zoriontsua. Ordua bete urduritasunez eta ordubete amaigabea. Ordua bete loak hartu ezinez eta ordubete eternoa. Ordua bete ezerezaz eta ordu aldaketa.