Diario de Noticias de Gipuzkoa

Martes, 25 de marzo de 2008

Foros
Hemeroteca

Buruztanka

Andreari bihotzez (eta II)

por estitxu fernandez

ire iritzia jakin nahi duzula diozu, Andrea, baina ez da jakin-mina, zuk ez duzu nire iritzia leitu nahi, zuk nire gaitzespena eskatzen duzu, modu ironikoan gainera: "No habrá una triste palabra de compasión… Merecerán por lo menos una gota de tu cariño… ". Zure tokian paratzeko ahalegina egin dut, eta ulertzen zaitut. Bakoitzari berea aitortu nahi diozu. Entenditzen dut hori, ez dut bada entendituko! Baina inpresioa dut, batzuei bertzeei baino gehiago eskatzen zaigula. Nik Porttu eta Mattin lagunak ditut. Ez dut uste inork eskatuko dienik Isaías Carrascoren lagunei torturak salatzeko. Hurrengo tortura kasua azaltzen delarik, inor ez zaie kontu eske joanen, zu niregana bezala. Bertzalde, ez dakit zertarako nahi duzun nire gaitzespena, mundu guztia, komunikabide eta politikari guztiak, gaitzetsi eta gai-tzetsi ari direlarik? Bertzerik ez da atentatu bat gertatzean; eta ez diot nik horrela behar ez duenik. Adierazpenak, elkarretaratzeak, manifestazioak, enpatia, doluminak. Porttu ospitalean eta Mattin inkomunikatuta zirela, ordea, non zen hori guztia? Ez zen. Eta zegoena isilarazi zen. Eta ahantzi. Beldurrak, minak eta inpotentziak janda gintuen egun haietan bakarrik sentitu nintzen, izugarri bakarrik, pentsa bere familia, pentsa beraiek. Porttu egoera larrian eraman zuten ospitalera, baina oraingoz ez dute inor ere atxilotu. Mattinen tortura salaketak ez dira ikertu ere eginen. Eta nork salatzen du hori? Eta zergatik ez die inork eskatzen sala dezaten? Nire zutabeetan, gai batzuetan indar handiagoa paratzen dut bertzeetan baino, egia da, Andrea. Denok egiten dugu hori, bakoitzak bere begietatik ikusten duelako mundua. Baina justifikaezina ez dut justifikatzen eta salagarria dena salatzen dut. Min denak zaizkit mingarri, min denentzako dut bihotza; ez hainbertze ahotsa, agian. Bozgorailua dutenek ez baitute nire beharrik, ahotsik ez dutenei ematen diet nirea. Ahotsa eta bihotza.