Diario de Noticias de Gipuzkoa

Jueves, 06 de marzo de 2008

Foros
Hemeroteca

Ziritik

Politikariak eta mizpiriak

por Xabier Euzkitze

OLITIKARIAK beste inoiz baino eskuraerrazago eta abegikorrago egoten dira hauteskunde aurreko egun, aste eta hilabeteetan. Urtebete lehenago elkarrizketa bati ezetz esan zion politikaria edozertarako prest agertzen zaizu bat-batean. Ez dit graziarik egiten politikari guztiak berdinak direla diotenen axalekotasunak, ez irribarrerik atera-tzen mizpirekiko alderaketa txatxuak: politikariak eta mizpirak, zenbat eta ustelagoak orduan eta hobeak. Ez zait iruditzen politikari ustel eta eskasen batez bestekoak tabernari, pilotari edo kazetariena gainditzen duenik, gehien ezagu-tzen ditudan gremioak aipatzeagatik. Alderantziz, agian. Tristea da, bestalde, milaka pertsonaren botoa hauteskunde kanpainaren arabera erabakitzen dela egiaztatzea. Zenbaitek gehiago begira-tzen dio hamabost eguneko saltzaile-tratulari festari lau urteko lanari baino. Hauteskunde kanpainan politikariek nazka ematea ulertzen dut. Niri, nazka baino gehiago, errukia ematen didate. Bolada batean neu ere ibilia naiz federik ez nion produktu baten salmentan, eta gorriak ikusi nituen. Alderdi txikietako ordezkariei inor gutxik egiten die jaramon azokara boto eske doazenean, askotan ezagutu ere ez. Oso ezagunei, aldiz, Sakozyri gertatu zi-tzaiona gerta lekieke, begitan hartua zauzkanen batek purrustada egitea. Nolanahi erreakzionatzen dutela ere, hor beti politikaria galtzaile, batez ere Sarkozyren moduko kaiku larderia-tsuak. Agintzariak, promesak. Derrigor egin beharrekoak bozak irabazi nahi dituenarentzat. Askotan ekonomikoki bideragarri ez direnak, edo sozialki alderdiaren filosofiaren aurka doazenak. Irabazteko ia zernahi egin behar, baina irabazi ondoren edozerk balio ez. Ala bai?