Diario de Noticias de Gipuzkoa

Martes, 12 de febrero de 2008

Foros
Hemeroteca

Buruztanka

Deliratzen

por estitxu fernandez

astroenteritisa gauza txarra da. Lau egun pasa ditut komunean, bota eta bota. Dena joan zait, bihotzeko mina izan ezik, eta bera dut tripak nahastearen eran tzule nagusi. Psikologoak erraten dit, tentsioak nonbaitetik egin behar duela ihes. Komuneko zulotik. Hesteak erreka bihurtu eta lau egunez aritu zaizkit orroka, eta ni erruki bila hurrengo lauretan, sofatik harrika ere ezin altxa. Tripako gaitza gauza txarra da. Eta ni, lehen txarra baldin banintzen, orain txarrago.

Txarra izan naiz beti, 50 kilo eskas, hori dut aspaldiko urteetako pisua, kilo bat goiti-beheiti. Metro eta hirurogeira ez naiz ailega-tzen halere. Perfumea ontzi ttikian beti, pozoina bezalaxe. Gurean "benenua". Pertsona gaiztoari, zitalari, bertzeen onurak ikusi ezin dituenari erraten diogu benenua. Bada nahi baino gehigo inguruan. Gaiztoari benenua eta higuina okaztagarriari, higuina eta ez higuingarria. Gustatzen zait hitz hori, higuina.

Eri egon naiz, eta ez erixko. Indarrik ez dut. Garbitu naizen sentipena dut ordea, barrutik garbitu. Kaka denak atera ditudan irudipena. Orain lan egin behar, dena berriz ere kakaztu ez dadin. Eta nola egiten da hori? Psikologoari galdetu beharko diot.

Eri egon naizen egunetan, komuna eta sofa izan ditut babesleku. Leitu egin dut, ahal nuen guztia. Euskal Hiria sutan bukatu dut eta A las ocho en el bule hasi eta buka. Nire barrenak erretzearekin batera ikusi dut nola erretzen ziren Euskal Hiria eta autobusak.

Hasi naiz berriz ere lanean, autobuseko joan etorriekin. Sutan paratzen nau errepideak baina autobuses nabilenez geroztik bidaia pentsatzeko profitatzen dut. Eta bihotzari aditzeko. Eta entzun dut zerbait xehatzen barrenean eta ez dira tripak. Baina irudika lezakete nire mina. Orain arte tenkatu nauen soka, eraman nauen soka, gidatu nauen soka luzea, luzea baina soka, eten egin zait. Esnea bezala moztu da, eta zapore mitzaka utzi dit zintzurrean.