Diario de Noticias de Gipuzkoa

Martes, 05 de febrero de 2008

Foros
Hemeroteca

Buruztanka

Mina gauza txarra da

por estitxu fernandez

METAN tripetatik sufritzen nuen nik. Sarritan paratzen ninduten buruzbeheiti lasaigarria zelakoan eta usaindu ere ezin nituen kamamilak prestatzen zizkidan amak. Zenbat aldiz joan ote gara medikura...eta beti gauza bera, haizeak izanen zirela edo auskalo zer, deus larririk ez bederen. Egun batez, hamabi urterekin, mina jasangaitz bihurtu zen arte. Larrialdietara joan ginen, ospitalera. Egun osoa eman genuen han, hamaika proba egin zizkidaten, eta azkenean betikoa. Apendizitisa ez zela eta haizeak izanen zirela, deus larririk ez bederen. Eta oinazeak etxera. Behiaren bortzgarren aratxea bezalaxe, babesik gabe.

Loak ezin hartuz gauez, sofan iraulka egunez. Beharrik ama ama den. Berak bazekien nire begiek zer zioten. Eta ama, ez da medikua, baina emakumea da. Ezintasuna gainditu eta intuizioari heldu zion. Ginekologora eraman ninduen. Hamabi urte baino ez nituen, umea nintzen. Ekografia bat aski izan zen. Sagar baten tamainako kistea nuen eskuineko obarioa itotzen.

Makina bat aldiz oroitu naiz etxera bidali ninduen medikuaz, mediku gizonezkoaz. Oinazea nabarmena zen, ez nintzen espantuka ari, platera hautsi eta ipurdiko minez. Berak egindako guztia ongi egina izanen zen, ez dut dudarik; ez zuen egin-beharreko dena egin, ordea.

Eta pentsatzen dut, zenbateraino eragin ote zuten, inkontzienteki bada ere, sexualitatearen gainekomitoek. Sexualitatea helduen eremua dela barru-barruan daramagun ideia da, umeek eta edadetuek ez dutela sexualitaterik. Desioa, erakarpena, gozamena... ez dira haurren eta aiton-amonekin ezkontzen. Ez nuena uste zen, obarioak ere, fisiologia hutsa, zaku horretan sartzen ahal zirenik. Eta are harrigarriagomediku baten kasuan.

Egunotan bizkarreko minez nabil; lasai nago.Mina gauza txarra da, batez ere buruari eragiten diolarik.