Ziritik
Ez nekien hilda nengoenik
IN Laden sakeleko telefonoaren bitartez lokalizaturik zuen Amerikako Estatu Batuetako armadak, bazekiten non zegoen. Gaizkile bizardunak susmoa hartu, ordea, eta bere esanetara zegoen bati eman zion segapotoa. Ondorioz, bonbardaketan Bin Laden hil zutela uste izan zuten, baina ordurako ihes eginda zegoen hiltzaile aberatsa. Alegia, lagun bat heriotzara kondenatu zuen bera salbatzearren. Ala-rengan fede izugarria izango du, ez dudarik izan, baina lagunak bidaltzen ditu hara, bera joan beharrean. Sasikume horren ihesa aitzakia baino ez zen gaur aipatu nahi dudana aipatzeko: kontrola. Guztiz kontrolaturik gauzkate. Sakeleko telefonoaren bitartez eginiko deiak, e-postaren bitartez bidalitako mezuak, txartel elektronikoen erabilera… horiek denak kontrolatzaileei ematen dizkiegun arrastoak dira, gure ibileren berri zehazki izan dezaten eskura jar-tzen dizkiegun pistak. Kontuan hartu beharrekoa da ordenadorea babestea ere, han ere kuxkuxero gaizto asko baitago. Banku eta erakundeek ere ederki dakite gure berri, ez dago ihesik. Lehengoan Foru Aldundiaren bulegoetara joan nintzen, paper baten eskean. Artatu ninduen neska ezaguna nuen eta goxo hartu ninduen. Halako batean, aurpegia aldatu zitzaion, zurbildu egin zen. Niri barkamena eskatu eta lankide batengana jo zuen. Berehala ohartu nintzen zerbait xelebrea gertatzen zela, eta badakizue Ogasunarekin ez dagoela txantxarik. Itzuli zenean azalpenak eskatu nizkion, eta erantzunak neu utzi ninduen zurbil: "Ba al dakizu zer gertatzen den? Oso kasu arraroa da, ez dakigu zergatik, baina zu hilda zaudela ageri da gure datu basean, zein egunetan hil zinen ere zehazten du. Lasai, zuzendu dugu". Ez zen txantxetan ari, benetan ari zen, eta ni ere hala ari natzaizue zuei. Bertan hil nadila diodana gezurra bada! Hasieran beldurtu egin nintzen, geroxeago haserretu. Badaezpada ez zioten zergak kobratzeari utzi, ez! Bestalde, hil nintzela garaiz jakinarazi izan balidate, eskelarako bertso itxurazko bat pentsatuko nuen gutxienez. Ez ordea, ez zidaten deus esan. Berriz hiltzen naizenerako erneago egongo naiz.
VECINOSDonostia
