Zarauzko merkataritzan euskararen erabilera bultzatuko dute

zarautz. Zarauzko Udaleko Euskara sailak herriko merkataritzan euskara bultzatu nahi du eta horretarako dendetako hizkuntza paisaia eta ohiturak aldatzeko ahaleginaren barruan, lehen urratsa den Eska ezazu euskaraz! kanpaina jarri du martxan, okindegi, arrandegi, harategi eta fruta-dendetan.

Herriko 60 denda baino gehiago bisitatu dituzte Euskara saileko kideek: 32 okindegi, 13 fruta-denda, 13 harategi eta 9 arrandegi. Honela, bezeroei jakinarazteko kartelak banatu dituzte. Karteletan, ogien, fruta eta barazkien, haragien edo arrainen izenak eta argazkiak datoz, kontsumitzaileak erosketak euskaraz egitera bultzatzeko.

Kartelekin batera, sektore bakoi-tzarentzat propio diseinatutako hiztegiak ere banatu dituzte eta halaber, sailak eskaintzen duen laguntzaren berri eman diete dendariei: errotuluak eta irudi korporatiboko elementuak euskalduntzeko diru laguntzak; itzulpenak eta hizkuntza aholkularitza (kontsultak); kartelak, norberak esandako testuarekin eta tamainan eta Dendaketan ikastaroa. Itzulpenak, kartelak eta Dendaketan ikastaroa doan eskaintzen dizkie Udalak merkatariei.

Dendaketan, oinarri-oinarrizko euskara ikastaroa da. Zerbitzua euskaraz emateko gai ez diren establezimenduetako langileei begira antolatu dute udazkenerako (urriaren 5etik abenduaren 16ra), astearte, asteazken eta ostegunetan, 14.30etik 16.30era. Eskolen gaineko informazioa nahi duenak, itzulpenak edota kartelak nahi dituenak, Euskara Zerbitzura jo dezake 943 005116 telefono zenbakira deituta edo euskaraz@zarautz.org helbidera idatziz.