"Ireki begiak, elkartu eta eutsi" programa, gazteek boluntariotza ezagutu dezaten

donostia. "Boluntario izateko bi gauza dira beharrezko: bata, denbora edukitzea eta, bigarrena, nahi izatea". Horiek dira Gizalde erakundeko kide Miren Gurrutxagaren ustetan boluntariotzaren oinarriak. Harekin batera ari dira lanean Donostian Ander Larrea eta Rakel Álvarez. Gizalde Gipuzkoako Boluntariotza 1998. urtean sortu zuten Euskadiko Kutxa, Hezkide Eskola eta Gipuzkoako Foru Aldundiak.

Haien xedea ere oso argia zen hasieratik. "Elkarte zein boluntarioek, beren ekintzak garatzeko behar zuten informazio, aholku, bitartekaritza, baliabideak eta materiala -proiektoreak edo kainoiak, besteak beste- ere eskaintzen ditugu elkartean", azpimarratu du Gurrutxagak. "Horrez gain, gazteen sentsibilizazio programa bat ere martxan jarri dugu, egun gizarteak ez baititu boluntariotzaren baloreak bultzatzen eta gero eta jende gutxiago animatzen baita boluntario egitera", gaineratu du.

"Ireki begiak!" Egoera honen aurrean, beharrezko sumatu zuten boluntariotzaren baloreak ezagu-tzera emango zituen ekimena martxan jartzea. Honela, Gizaldeko kideek eta Eusko Jaurlaritzako Etxebizitza sailak Ireki begiak, elkartu eta ekin! programa abiatu zuten.

Proiektua 16 urtetik gorako gazte gipuzkoarrei dago zuzenduta eta Rakel Álvarez arduratzen da hezkuntza zentroetara bertaratu eta saioak gidatzeaz. "Helburu nagusia gazteei boluntariotzaren berri ematea eta etorkizunean boluntario izatera edo beren inguruan sumatzen dituzten beharrei erantzuna emateko aktiboki parte hartzera animatzea da", esan du Álvarezek.

Saioak hiru atal edo fasetan bana-tzen dira. Lehengoan (hausnarketa fasea) ikasleek sumatzen dituzten beharren inguruan egin behar dute gogoeta. Fase kritikoari dagokionez, boluntariotza eta gizarte parte-hartzearen berri emango zaie gazteei eta atal parte-hartzailean, azkenik, gazteak elkarteetara hurbildu eta boluntario lana ezagutzea ahalbidetzen diete.

Programan parte hartzeko interesa dutenek Gizaldek Donostian (Idiakez, 6) duen egoitzara bertaratu besterik ez dute. 943 428013 zenbakira ere dei dezakete, edota gizalde@gizalde.com helbidera e-posta bidali. Azkenik, elkartearen web orrialdean (www.gizalde.com) ere kontsulta dezakete.