Eskualdeko emakumeen txanda

Urola bailarako bizilagunek Azpeiti eta Azkoitiko emakume antzezleak taula gainean ikusteko aukera ezinhobea izango dute asteburu honetan Azpeitiko XXVII. Euskal Antzerki Topaketen barruan.

Hasteko, Alaitz Olaizola, Gurutze Eizmendi eta Idoia Uranga hirukoteak osatzen duen Lakrikun taldearen txanda izango da. Konpainiak Prest gaude izeneko lana estreinatuko du larunbatean Izarraitz pilotalekuan, 21.30ean hasita.

Alaitzek berak esandakoari eutsiz, etzi ikusi ahal izango den obra Greban gaude lan arrakastatsuaren jarraipena izateko asmoarekin sortutakoa da: "izenburuek dioten bezala, lehen greban geunden baina orain, adina aurrera doala, prest gaude jada".

Azpeiti eta Azkoitiko hiru antzezle hauek hainbat alditan aritu dira Azpeitiko antzerki jardunaldietan. Hala ere, "kriston poza" hartzen dute beren eskualdean lan berri bat estreinatzeko aukera dutenean.

Hori bai, etxeko agertokira atera-tzen direnenean nerbioak "dobleak" direla aitortzen dute. Beraien hitzetan "oso pozgarria da aretoan herritarrak eta ezagun ugari ikustea baina, era berean, egoera horrek errespetu handia ematen du, dena ondo ateratzea nahi dugulako".

Igandean, "Autobusaren zain II"

Azpeitiko Emakumearen antzerki tailerraren eskutik

Igandean, Alaitz Olaizolak idatzitako Autobusaren zain liburuan oinarritutako izen bereko obra ikusteko parada izango da Izarraitz pilotalekuan (19.30ean).

Taula gainean, Azpeitiko Udaleko Parekidetasun sailak antolatzen duen Emakumearen antzerki tailerrean parte hartzen duten herriko hamar emakume arituko dira.

Antzezle gazteenak 20 urte ditu eta helduenak 68. Denak "ilusioz beterik" aterako dira agertokira eta, hori dela eta, herritar guztiak animatu nahi dituzte saioa ikustera joateko.